vo masiha na bana ham ne bhi khvahish nahin ki
apni sharton pe jiye us se guzarish nahin ki
us ne ik rose kiya ham se achanak vo saval
dhadkanen tham si gaiin vaqt ne jumbish nahin ki
kis liye bujhne lage avval-e-shab saare charagh
andhiyon ne bhi agarche koi sazish nahin ki
ab ke ham ne bhi diya tark-e-taalluq ka javab
hont khamosh rahe aankh ne barish nahin ki
ham to sunte the ki mil jaate hain bichhde hue log
tu jo bichhda hai to kya vaqt ne gardish nahin ki
us ne zahir na kiya apna pasheman hona
ham bhi anjan rahe ham ne bhi pursish nahin ki
Leave a Reply