Kaam Sab Ghair-Zaruri Hain Jo Sab Karte Hain

kaam sab ghair-zaruri hain jo sab karte hain

aur ham kuchh nahin karte hain ghazab karte hain

aap ki nazron men suraj ki hai jitni azmat

ham charaghon ka bhi utna hi adab karte hain

ham pe hakim ka koi hukm nahin chalta hai

ham qalandar hain shahanshah laqab karte hain

dekhiye jis ko use dhun hai masihai ki

aaj kal shahr ke bimar matab karte hain

khud ko patthar sa bana rakkha hai kuchh logon ne

bol sakte hain magar baat hi kab karte hain

ek ik pal ko kitabon ki tarah padhne lage

umr bhar jo na kiya ham ne vo ab karte hain

Leave a Comment