Baja Ki Paband-e-Kucha-e-Naz Hum Hue The

Abdul Ahad Saaz

baja ki paband-e-kucha-e-naz ham hue the

yahin se par le ke mahv-e-parvaz ham hue the

sukhan ka aghaz pahle bose ki tazgi tha

azal-ruba saaton ke hamraz ham hue the

jahan se maadum thi khush-aindagi safar ki

vahin se ik lamha-e-tag-o-taz ham hue the

yahan jo ik guunj daere se bana rahi hai

isi khamoshi men sang-e-avaz ham hue the

ravan-davan inkishaf-dar-inkishaf the ham

jo mud ke dekha to segha-e-raz ham hue the

ufuq tha raushan na murtaish paniyon pe kirnen

ghalat jaziron pe langar-andaz ham hue the

kuredte phir rahe hain ab ret sahilon ki

vahi jo ghota-zan-e-yam-e-raz ham hue the

jumud ka ek daur guzra tha fikr-o-fan par

tavil arse ke baad phir ‘saz’ ham hue the