ret muTThi men bhari paani se aghaz kiya
saḳht mushkil men tha asani se aghaz kiya
mujh ko miTTi se badan bante hue umr lagi
meri ta.amir ne virani se aghaz kiya
ye jahanon ka zamanon ka makanon ka safar
ghaib ne lafz se ya ma.ani se aghaz kiya
jab bhi ye aankh anasir ki taraf dekhti hai
yaad aata hai pareshani se aghaz kiya
jism aur ism mujhe kaise mile kis ne diye
in savalat ki hairani se aghaz kiya
ek ḳhamosh samundar tha mire chaar taraf
jis men avaz ne tughyani se aghaz kiya
mujh ko bad-surati-e-jism ka andaza hai
main ne a.ina-e-uryani se aghaz kiya
Leave a Reply