zahid ke dil men but hai musalman nahin raha
ye barahman hai sahab-e-iman nahin raha
malte hain haath yaas se dast-e-junun mire
afsos koi tar-e-gareban nahin raha
sad-shukr apne saath dil us ko bhi le gaya
jo chheḌta tha ham ko vo arman nahin raha
tasvir-e-yar mujh ko tasavvur bana chuka
par shukr hai ḳhuda ka pareshan nahin raha
pahuncha diya saba ne use ku-e-yar men
apna ghubar be-sar-o-saman nahin raha
lab-basta daf.atan jo hua zaḳhm-e-dil mira
dilbar ke ḳhvan ka vo namak-dan nahin raha
insaniyat hai jis men dila hai vo aadmi
haivaniyat hai jis men vo insan nahin raha
ifsha ye raz-e-ishq hua meri aah se
jis ko chhupa rahe the vo pinhan nahin raha
ashiq ki turbaton ko miTa kar ye kah diya
lo ab nishan-e-gor-e-ghariban nahin raha
apni sada suna ke har ik yaan se chal basa
gulshan men koi murgh-e-ḳhush-ilhan nahin raha
jo qaidi-e-mehan the ‘jamila’ vo chal base
zindan men koi sahab-e-zindan nahin raha
Leave a Reply