Meer Hasan
ankhon se khuun apne ye kahta nahin na jaae
par saath us ke lipta hua dil kahin na jaae
itni to chahiye tujhe pas-e-shikasta-dil
jo aave tere yaan so vo andohgin na jaae
sabr-o-qarar-o-hosh-o-khirad sab ke sab ye jaaen
par dagh-e-ishq siine se ai ham-nashin na jaae
dair-o-haram men ja ke jo chahe phir aa sake
par aave jo gali men tiri vo kahin na jaae
ham girya-nak hain ye sada se hai aib-posh
ankhon se duur apne kahin astin na jaae
hai para-e-aqiq jigar dekhiyo kahin
ai chashm tere haath se aisa nagin na jaae
nikle na jaan tan se ‘hasan’ ki to tab talak
jab tak tu us ke sar pe dam-e-vapsin na jaae
Leave a Reply