ab ke mile to ham donon hi
ḳhud ki tujh se baat karenge
ḳhud ki ḳhud se baten kar ke
ham donon ukta bhi chuke hain
tere ḳhayalon men Duube to
duniya saari ghuum li ham ne
dar pe ik dastak jo hui to
ham ko ye ma.alum hua ke
kab se ham ghar aa bhi chuke hai
raton ko jagte rahna bhi
ḳhvabon se bachte rahna bhi
ankhon ki majburi hogi
ankhon ke qisse se ham to
apni aankh bacha bhi chuke hain
is mausam ka kya hai parson
narson ye bhi chal hi dega
ek gila bas tum se hai ki
us mausam men aa.e ho jab
ḳhud ko ham bahla bhi chuke hain
ghar ke har kone se ab bhi
mahak hamari chunte hoge
yadon ke pashmina se tum
kal ko pal-pal bunte hoge
lekin sach to ye hai sathi
ham to kab ke ja bhi chuke hain
Leave a Reply