niind men khulte hue ḳhvab ki uryani par
main ne bosa diya mahtab ki peshani par
is qabile men koi ishq se vaqif hi nahin
log hanste hain miri chak-girebani par
nazar aati hai tujh aison ko shabahat apni
main ne tasvir bana.i thi kabhi paani par
ham faqiron ko isi ḳhaak se nisbat hai bahut
ham na baiThenge tire taḳht-e-sulaimani par
us se kuchh ḳhaas ta.alluq bhi nahin hai apna
main pareshan hua jis ki pareshani par
paas hai lafz ki hurmat ka vagarna ‘azar’
koi tamgha to nahin milta ghazal-ḳhvani par
Leave a Reply