yuun ashk baraste hain mire dida-e-tar se
jis tarah se savan ki ghata jhuum ke barse
haan ashk-e-nadamat jo gire dida-e-tar se
vo daman-e-isyan pe nazar aae guhar se
mahaul to badla hai miri jehd ne akasr
haan main nahin badla kabhi mahaul ke dar se
duniya na kahin mujh ko nigahon se gira de
ab itna gira do na mujhe apni nazar se
dekhe jo koi sada-mizaji to ye samjhe
vaqif hi nahin aap kisi aib-o-hunar se
jis raah men guzri hai mire sar pe qayamat
sau baar to guzra huun usi rahguzar se
is vaqt jo guzri hai na puchho use ‘vasfi’
takrai hai jab un ki nazar meri nazar se
Leave a Reply