khuda ke fazl se ham haq pe hain batil se kya nisbat
hamen tum se taalluq hai mah-e-kamil se kya nisbat
mah-e-kanan ko mere is mah-e-kamil se kya nisbat
zulekha ke mulavvis dil ko mere dil se kya nisbat
hama ka ram zi-khud-kami ba-badnami kashid akhir
kabhi main ne na socha raaz ko mahfil se kya nisbat
kahe jaata hai jo vaaiz sune jaate hain ham lekin
jo ahl-e-dil nahin us ko hamare dil se kya nisbat
mujhe hai sadma-e-hijran adu ko saikdon khushiyan
mire ujde hue ghar ko bhari mahfil se kya nisbat
khuda hi phir bharosa hai khuda hai nakhuda mera
vagarna main bhanvar men huun mujhe sahil se kya nisbat
firaq-e-yar men mera dil-e-muztar na thahrega
tumhin socho sukun ko tair-e-bismil se kya nisbat
kaniz-e-hazrat-e-mushkil-kusha huun dil se main ‘parvin’
taalluq mujh ko asani se hai mushkil se kya nisbat
Leave a Reply