mohabbat kar chuki hai kaam apna
mujhe ma.alum hai anjam apna
nahin is mai-kade men kaam apna
jahan mai ho para.i jaam apna
mohabbat to mohabbat hi rahegi
zarurat kuchh bhi rakh le naam apna
muqaddar bhi badalna jante hain
guzarish hi nahin hai kaam apna
jo ḳhud apni nazar se gir chuke hain
unhen bhi gardish-e-ayyam apna
tum aur ye zahmat-e-tajdid-e-alam
mujhi ko saunp dete kaam apna
pareshani muqaddar ban chuki hai
pareshani men DhunD aram apna
ḳhuda.i ruḳh badalna chahti hai
mire mathe pe likh do naam apna
zamana de na de paigham ‘anjum’
zarurat ḳhud karegi kaam apna
Leave a Reply