Shafaq Sopori
ab is qadar bhi badal ja.ega ḳhabar nahin thi
fana se duur nikal ja.ega ḳhabar nahin thi
mire badan ki hararat utarne vaala
miri tapish se pighal ja.ega ḳhabar nahin thi
vo ibtida-e-mohabbat ke pahle lamhe ko
bana ke aḳhiri pal ja.ega ḳhabar nahin thi
baḌhegi luqma-e-dil se bhi aage us ki havas
ye nafs tan ko nigal ja.ega ḳhabar nahin thi
gila tha atish-e-nok-e-qalam se kaghaz ko
magar siyahi se jal ja.ega ḳhabar nahin thi
samajh rahe the jise naqsh-bar-sarab kabhi
vo mauj ban ke uchhal ja.ega ḳhabar nahin thi
bahut tha saya-e-abr-e-ghubar-e-dasht magar
zara si der men Dhal ja.ega ḳhabar nahin thi
ye sang-e-ḳhvab ‘shafaq’ aankh ke pasine par
kisi bhi vaqt phisal ja.ega ḳhabar nahin thi
Leave a Reply