Raza Hamdani
husn paband-e-hina ho jaise
ye vafaon ka sila ho jaise
yuun vo karte hain kinara mujh se
is men mera hi bhala ho jaise
ta.ana dete hain mujhe jiine ka
zindagi meri ḳhata ho jaise
is tarah aankh se Tapka hai lahu
shaḳh se phuul gira ho jaise
sar-e-kohsar vo badal garja
dil dhaḌakne ki sada ho jaise
hal-e-dil puchhte ho yuun mujh se
tum mire dil se juda ho jaise
yaad yuun aa.i tiri ruk ruk kar
koi zanjir-ba-pa ho jaise
ab jafa ko bhi taraste hain ‘raza’
yahi tasir-e-dua ho jaise
Leave a Reply