Daera

roz badhta huun jahan se aage

phir vahin laut ke aa jaata huun

bar-ha tod chuka huun jin ko

unhin divaron se takrata huun

roz baste hain kai shahr nae

roz dharti men sama jaate hain

zalzalon men thi zara si garmi

vo bhi ab roz hi aa jaate hain

jism se ruuh talak ret hi ret

na kahin dhuup na saaya na sarab

kitne arman hain kis sahra men

kaun rakhta hai mazaron ka hisab

nabz bujhti bhi bhadakti bhi hai

dil ka maamul hai ghabrana bhi

raat andhere ne andhere se kaha

ek aadat hai jiye jaana bhi

qaus ik rang ki hoti hai tulu

ek hi chaal bhi paimane ki

goshe goshe men khadi hai masjid

shakl kya ho gai mai-khane ki

koi kahta tha samundar huun main

aur miri jeb men qatra bhi nahin

khairiyat apni likha karta huun

ab to taqdir men khatra bhi nahin

apne hathon ko padha karta huun

kabhi quran kabhi giita ki tarah

chand rekhaon men simaon men

zindagi qaid hai siita ki tarah

raam kab lautenge maalum nahin

kaash ravan hi koi aa jaata

Leave a Comment