Rashid Aazar
fasla rakkho zara apni mudaraton ke biich
duriyan baḌh ja.engi paiham mulaqaton ke biich
kya bharosa kam hua be-e’tibari baḌh ga.i
tanz ka lahja dar aaya pyaar ki baton ke biich
tu bhi mere aks ke manind mere saath hai
main akela kab raha huun dukh bhari raton ke biich
shikva-sanji ne ḳhulus–e-iltija kam kar diya
kuchh shikayat bhi zaban par thi munajaton ke biich
band darvaze pe kya ‘azar’ dua ko haath uThe
ya adhuri rah ga.i dastak tire hathon ke biich
Leave a Reply