Poet
dil men aate hi ḳhushi saath hi ik gham aaya
iid aa.i to main samjha ki moharram aaya
ḳhun-e-dil ho gaya shayad dam-e-girya jo aaj
evaz-e-ashk lahu ankhon se paiham aaya
nazuki kahte hain us ko ki hazaron bal khate
ta-kamar yaar ka jab gesu-e-pur-ḳham aaya
dil men hai jalva-kunan chah-e-zanaḳhdan ka ḳhayal
ain ka.abe men nazar chashma-e-zamzam aaya
phir bahar aa.egi phir dagh-e-junun chamkenge
phir su-e-burj-e-hamal nayyar-e-azam aaya
pak-daman hai to aisa ki pa.e sidq-kalam
shan-e-ismat men tiri sura-e-mariyam aaya
di duha.i tiri rahmat ki gunahgaron ne
lab-e-va.iz pe junhi nam-e-jahannam aaya
dasht-e-ghurbat men ba-juz bekasi-o-yas-o-alam
qabr-e-majnun pe na koi pa.e matam aaya
sher-goi hai vo shai jin ka sila dene ko
ḳhvab-e-firdausi-e-ḳhush-fikr men rustam aaya
phir gaya ankhon men us kaan ke moti ka ḳhayal
gosh-e-gul tak na koi qatra-e-shabnam aaya
jite-ji hi ke the sab yaar pas-e-marg ‘qalaq’
gor par koi na gham-ḳhvar na hamdam aaya
Leave a Reply