Bharat Bhushan Pant
ḳhvahish-e-parvaz hai to bal-o-par bhi chahiye
main musafir huun mujhe raḳht-e-safar bhi chahiye
is qadar bhi ranj ka ḳhugar nahin huun main abhi
raste men dhuup ho to ik shajar bhi chahiye
yuun mukammal ho nahin sakta koi bhi aks ho
aa.ina bhi chahiye zauq-e-nazar bhi chahiye
sirf sanson ka tasalsul hi nahin hai zindagi
apne hone ki hamen koi ḳhabar bhi chahiye
doston ki is ada par ho gaya qurban main
meri pagḌi le chuke ab mera sar bhi chahiye
mutma.in sahra men aa ke bhi nahin tanha.iyan
shaam hote hi inhen divar-o-dar bhi chahiye
Leave a Reply