Imtihan Ke Liye Jafa Kab Tak

imtihan ke liye jafa kab tak

iltifat-e-sitam-numa kab tak

ghair hai bevafa pa tum to kaho

hai irada nibah ka kab tak

jurm malum hai zulekha ka

tana-e-dast-e-narasa kab tak

mujh pe ashiq nahin hai kuchh zalim

sabr akhir kare vafa kab tak

dekhiye khaak men milati hai

nigah-e-chashm-e-surma-sa kab tak

kahin ankhen dikha chuko mujh ko

janib-e-ghair dekhna kab tak

na milaenge vo na aenge

josh-e-labbaik-o-marhaba kab tak

hosh men aa tu mujh men jaan nahin

ghaflat-e-jurat-azma kab tak

le shab-e-vasl-e-ghair bhi kaati

tu mujhe azmaega kab tak

tum ko khu ho gai burai ki

darguzar kijiye bhala kab tak

mar chale ab to us sanam se milen

‘momin’ andesha-e-khuda kab tak

Leave a Comment