Zafar Iqbal
hamare sar se vo tufan kahin guzar gae hain
chadhe hue the jo dariya sabhi utar gae hain
rahe nahin hain kabhi ek haal par qaaem
simat gae hain kabhi aur kabhi bikhar gae hain
usuul hai ki khala yunhi rah nahin sakta
hue hain khud se jo khali so tujh se bhar gae hain
ruke bhi hain to dobara ravangi ke liye
chale bhi hain to kahin raah men thahar gae hain
tumhare ahd-e-taghaful men ji rahe hain abhi
hua hai kuchh tumhen hasil na ham hi mar gae hain
nikal pade to phir apna suragh mil na saka
tumhare paas hi pahunche na apne ghar gae hain
vahi hai daera-e-khvab ibtida-e-safar
usi qadar hue vapas bhi jis qadar gae hain
isi kami ka hai ehsas aur hairani
hain aur to sabhi maujud ham kidhar gae hain
‘zafar’ hamari mohabbat ka silsila hai ajiib
jahan chhupa nahin paae vahan mukar gae hain
Leave a Reply