masarraton ka khila hai har ek samt chaman
magar ye dil ki hai phir bhi qatil-e-ranj-o-mehan
baḌe sukun se zulfen sanvarne vaale
kisi ki ziist na ban jaa.e mustaqil uljhan
mire junun pe rahe log mo’tariz lekin
na dekhe aah kisi ne tire ḳhutut-e-badan
abhi to harf-e-tamanna ka zikr tak bhi nahin
abhi na Daal ḳhuda ke liye jabin pe shikan
dil-e-fasurda men yuun teri yaad aa.i hai
shab-e-siyah men jis tarah raushni ki kiran
ye kis ne jhuum ke masti men li hai angḌa.i
fusun-taraz hai ye kis ka rang-e-pairahan
guzar gaya hai zamana magar mujhe ‘rif.at’
hai ab bhi yaad kisi ki nigah-e-tauba-shikan
Leave a Reply