Rasheed Lakhnavi
jab se suna dahan tire ai mah-ru nahin
sab chup hain ab kisi ki koi guftugu nahin
nikle jo qalb se vo miri aarzu nahin
tu mil hi jaa.e gar to main samjhun ki tu nahin
ankhen laḌa rahe ho sar-e-bazm ghair se
aur mujh se ye bayan ki ham jang-ju nahin
paida hua hai ek ki zid ek ḳhalq men
izzat hai ghair ki tu miri aabru nahin
Tanke na kha.en zaḳhmi-e-tegh-e-nigah-e-naz
kahne ko ho ki jama-e-tan men rafu nahin
ma.ashuq kaun sa hai na ho dil men jis ki yaad
is muḳhtasar se baagh men kis gul ki bu nahin
ye haal teri va.ada-ḳhilafi se ho gaya
ab to qasam bhi khane ko mujh men lahu nahin
piiri hai ashiqi ka maza ja chuka ‘rashid’
vo ham nahin vo dil nahin vo aarzu nahin
Leave a Reply