muskan labon par ankhon men taron ka sajana mushkil hai
dil toḌna hai asan lekin rote ko hansana mushkil hai
hai kanch sifat dil siine men jab TuTta hai phir juḌta nahin
jis chiiz se dil uTh jaata hai phir us se lagana mushkil hai
ai bulbul-e-dil yuun gham pi kar mat chahak ki ab lab ko si le
sab saaz burida-hal hue ab raag purana mushkil hai
ai ḳhair-talab afrad chalo apni janen qurban karen
be-ḳhun baha.e duniya ko ghaflat se jagana mushkil hai
tum kaghzi kashti men dariya ko paar karo tab samjhoge
ashkon se labalab ankhon men kyuun ḳhvab sajana mushkil hai
maana ki muqaddar hai furqat lazim hai juda.i bhi lekin
in sard andheri raton men dil ko samjhana mushkil hai
Leave a Reply