Muskan Labon Par Aankhon Mein Taron Ka Sajaana Mushkil Hai

muskān laboñ par āñkhoñ meñ tāroñ kā sajānā mushkil hai

dil toḌnā hai āsāñ lekin rote ko hañsānā mushkil hai

hai kāñch sifat dil siine meñ jab TūTtā hai phir juḌtā nahīñ

jis chiiz se dil uTh jaatā hai phir us se lagānā mushkil hai

ai bulbul-e-dil yuuñ ġham pī kar mat chahak ki ab lab ko sī le

sab saaz burīda-hāl hue ab raag purānā mushkil hai

ai ḳhair-talab afrād chalo apnī jāneñ qurbān kareñ

be-ḳhūn bahā.e duniyā ko ġhaflat se jagānā mushkil hai

tum kāġhzī kashtī meñ dariyā ko paar karo tab samjhoge

ashkoñ se labālab āñkhoñ meñ kyuuñ ḳhvāb sajānā mushkil hai

maanā ki muqaddar hai furqat lāzim hai judā.ī bhī lekin

in sard añdherī rātoñ meñ dil ko samjhānā mushkil hai

Leave a Comment