Aziz Lakhnavi
mere rone pe ye hansi kaisi
ai sitamgar ye dil-lagi kaisi
khul ga.i phir koi rag-e-dil kya
dida-e-ḳhushk hain nami kaisi
hosh hai tujh ko ḳhaak ke putle
ye tamarrud ye sar-kashi kaisi
tha ye ik imtihan tabi.at ka
varna naseh se dosti kaisi
ro raha huun isi tasavvur men
di thi ye mujh ko zindagi kaisi
ab to is dar tak aa ga.e ho ‘aziz’
sambhlo sambhlo ye be-ḳhudi kaisi
Leave a Reply