Swad-E-Gham Ho Ya Bazm-E-Tarab Kuchh Bhi Nahin Hota

svad-e-gham ho ya bazm-e-tarab kuchh bhi nahin hota

zaban marham rakkhe ya zakhm ab kuchh bhi nahin hota

chale aate hain be-mausam ki barish ki tarah aansu

basa-auqat rone ka sabab kuchh bhi nahin hota

jo hota hai to bas itna ki lafzon ka bharam tuute

sukhan aata hai akasr ta-ba-lab kuchh bhi nahin hota

kabhi the mehrban mausam kabhi savan barasta tha

aur ab dharti hai saari tishna-lab kuchh bhi nahin hota

tamanna jhankti hai rauzan-e-zindan se chhup chhup kar

asiri men magar anjam-e-shab kuchh bhi nahin hota

qayamat si guzarti hai qayamat aa nahin jaati

koi be-jan ho ya jan-ba-lab kuchh bhi nahin hota

jibillat sar utha le to khas-o-khashak hai insan

bada ho naam ya uncha nasab kuchh bhi nahin hota

yahan hota hai bad-az-marg vavaila bahut lekin

koi mar mar ke jab jiita ho tab kuchh bhi nahin hota

ye duniya hai yahan tarikh hi dohrai jaati hai

anokha kuchh nahin hota ajab kuchh bhi nahin hota