Hasan Zaheer Raja
siine mohabbaton se munavvar kiye ga.e
ham dusron se aise bhi behtar kiye ga.e
vaise tumhara ḳhauf bhi kaafi ziyada tha
kuchh faisle to ḳhud se bhi Dar kar kiye ga.e
yak dam kisi ne ham ko gale se laga liya
sahra se ek pal men samundar kiye ga.e
ba-qa.eda hamara liya ja raha tha naam
phir dekhte hi dekhte digar kiye ga.e
ab aa.ine ke aage khaḌe sochte hain ham
kuchh tajarbe ziyada hi ḳhud par kiye ga.e
ab aap in ko sher kahen ya nahin kahen
kuchh ranj the jo daḳhil-e-daftar kiye ga.e
Leave a Reply