vaqt ne rang bahut badle kya kuchh sailab nahin aa.e
miri ankhen kab viran huiin kab tere ḳhvab nahin aa.e
dil sahra ka vo tishna-lab har baar yahi socha jis ne
mumkin hai ki aage dariya ho aur koi sarab nahin aa.e
ham log kyuun itne pareshan hain kis baat par aḳhir nalan hain
kya saari baharen ruuTh ga.iin kya ab ke gulab nahin aa.e
tum qurb ki rahat kya samjho tum hijr ki vahshat kya jaano
tum ne vo raat nahin kaaTi tum par vo azaab nahin aa.e
pahle bhi jahan par bichhḌe the vahi manzil thi is baar magar
vo bhi be-laus nahin lauTa ham bhi be-tab nahin aa.e
ye bazm-e-‘hilal’ hai ḳhuub magar jab tak na suna.en aap ghazal
chehron ke gulab nahin mahken mahfil pe shabab nahin aa.e
Leave a Reply