Nooh Narvi
jo achchhe hain un ki kahani bhi achchhi
laḌakpan bhi achchha javani bhi achchhi
tiri mehrbani na achchhi ho kyuun kar
ki hai teri na-mehrbani bhi achchhi
dar-e-yar se ham ko uThna hai mushkil
jo aisi ho to na-tavani bhi achchhi
tire tiir ko apna dil kyuun na den ham
nishana bhi achchha nishani bhi achchhi
jo ho sidq-e-dil se koi sunne vaala
to vallah jhuTi kahani bhi achchhi
kahin ishq men bad-gumani buri hai
kahin ishq men bad-gumani bhi achchhi
mai-e-nab ki qadr ham jante hain
na.i to na.i ye purani bhi achchhi
na ho dil men lekin mire dil ke haq men
tumhari mohabbat zabani bhi achchhi
agar ‘nuh’ ki sher-goi hai behtar
to hai ‘nuh’ ki sher-ḳhvani bhi achchhi
Leave a Reply