Jigar Moradabadi
har haqiqat ko ba-andaz-e-tamasha dekha
khuub dekha tire jalvon ko magar kya dekha
justuju men tiri ye hasil-e-sauda dekha
ek ik zarre ka aghosh-e-talab va dekha
aina-khana-e-alam men kahen kya dekha
tere dhoke men khud apna hi tamasha dekha
ham ne aisa na koi dekhne vaala dekha
jo ye kah de ki tira husn sarapa dekha
dil-e-agah men kya kahiye ‘jigar’ kya dekha
lahren leta hua ik qatre men dariya dekha
koi shaista-o-shayan-e-gham-e-dil na mila
ham ne jis bazm men dekha use tanha dekha
Leave a Reply