Hari Chand Akhtar
mohabbat men tapake-zahiri se kuchh nahin hota
jahan dil ko lagi ho dil-lagi se kuchh nahin hota
ye hai jabr-e-mashiyat ya miri taqdir hai yarab
sahara jis ka leta huun usi se kuchh nahin hota
koi meri ḳhata hai ya tiri san.at ki ḳhami hai
farishte kah rahe hain aadmi se kuchh nahin hota
tire ahkam ki duniya mire a.amal ka mahshar
yahan meri vahan teri ḳhushi se kuchh nahin hota
raza teri likha taqdir ka meri ziyan-koshi
kisi ki dosti ya dushmani se kuchh nahin hota
Leave a Reply