ab is qadar bhi to be-abru na samjha jaa.e
ki aarzu ko miri aarzu na samjha jaa.e
tumhari yaad ka har zaḳhm rista rahta hai
main be-vuzu huun magar ba-vazu na samjha jaa.e
main apne aap se ḳhalvat men baat karta huun
use maraz ai mere chara-ju na samjha jaa.e
vo apna aks agar mujh men dekh hi na sake
to aa.ine ko mire ru-ba-ru na samjha jaa.e
main sirf sunta huun aur sirf bolta vo hai
use ḳhuda ke liye guftugu na samjha jaa.e
ye ek roz koi inqalab la.ega
mira lahu hai use bas lahu na samjha jaa.e
bhaTak raha hai agar dil namaz men to miyan
jo qibla-ru hai use qibla-ru na samjha jaa.e
Leave a Reply