dekhte dekhte jab maut sitare ki hui
phir koi sub.h kahan ḳhvab ke maare ki hui
vo muhajir tha muhajir ka muhajir hi raha
kab tire shahr men tadbir guzare ki hui
us ke farman sabhi dil ki siyahi ne likhe
aisi tauhin kahan nur-nazare ki hui
bujhte bujhte bhi hui atish-e-jan tez bahut
aur jo rasm thi baaqi vo sharare ki hui
zindagi bhi kisi bazar ki aurat ki tarah
na biyahe ki hui aur na kanvare ki hui
kya suna.un tujhe rudad-e-safar kaisi hai
dhuup aamad ki hui chhanv ḳhasare ki hui
yuun to vo chand bhi be-dagh nahin tha ‘ḳhurshid’
aur mujh se bhi ḳhata ek ishare ki hui
Leave a Reply