Poet
na garmi rakhe koi us se ḳhudaya
shararat se ji jis ne mera jalaya
na bechain ho koi ab us ki ḳhatir
mira chahna jo na ḳhatir men laaya
baham dekh do shaḳhs ho vo bhi muztar
akela main jis ke liye tilmilaya
phire justuju men na ab koi us ki
mujhe jis ne galiyon men barson phiraya
na bhule se yaad ab kare koi us ko
mira yaad karna bhi jis ne bhulaya
na ḳhush ho ab us paas baiThe se koi
hamen kar ke azurda jis ne uThaya
ḳharidar paida na ho koi us ka
ki dil bech kar ham ne dukh jis se paaya
tahayyur ho dekh a.ina us ko jis ne
hamen kar ke hairan na mukhḌa dikhaya
lage laag us se kisi ki na ya-rab
hamari lagi ko na jis ne bujhaya
kahun dastan main gar apni aur us ki
to hairan ho sun ke apna paraya
ki pahle ki iz.har ḳhud us ne ulfat
na aaya to sau baar ghar se bulaya
jata.in vo baten jinhen sehr kahiye
dikhaya vo aalam ki vahshi banaya
rakhi be-takalluf mulaqat chande
ba-mannat mujhe paas pahron biThaya
kisi ka na ik harf ḳhatir men guzra
use garche logon ne kya kya paḌhaya
so ab vo jhalak tak dikhata nahin hai
gaya main jo ghar se to dar tak na aaya
lagavaT ye kuchh kar ke phir kya ghazab hai
mira lag gaya dil to parda lagaya
ba-tagh.ir-e-bahr aur ‘jur.at’ ghazal kah
ki ye turfa mazmun tu ne sunaya
Leave a Reply