be-ḳhabar hone se pahle ki ḳhabar to dekhte
Dubte suraj ki janib ik nazar to dekhte
chheḌ kar zikr-e-juda.i samne us ke kabhi
us ke chehre se huvaida us ka Dar to dekhte
dekhne us ko gali ki samt gar jaane ko the
auj par betabi-e-divar-o-dar to dekhte
jis ne milna hi nahin hai us ko paane ki talash
be-vajah kar ke kabhi koi safar to dekhte
haath se chhu kar nahin to paas hi ja kar use
shahar men utra hai ik rashk-e-qamar to dekhte
garmiyon men dasht-e-hijran ka safar rakhna kabhi
dhuup men jal kar samar dete shajar to dekhte
raat ki tarikiyon men ghar se niklo to ‘na.im’
dekhte hain kis tarah se be-basar to dekhte
Leave a Reply