dil par laga rahi hai vo nichi nigah choT
phir choT bhi vo choT jo hai be-panah choT
phoḌa sar us ke dar se ki barse junun men sang
mujh ko dila rahi hai ajab ishtibah choT
bijli ka naam sunte hi ankhen jhapak ga.iin
rokegi meri aah ki kya ye nigah choT
lalach asar ka ho na kahin ba.is-e-zarar
Takra ke sar falak se na kha jaa.e aah choT
munh har dahan-e-zaḳhm ka siite hain is liye
matlab hai hashr men bhi na ho dad-ḳhvah choT
milti hai chup ki daad ye mash.hur baat hai
jal jaa.e asman jo kare zabt aah choT
uThte hi dil men Tiis jigar men Tapak hui
karti hai dard-e-hijr se goya nibah choT
chaukhaT pe teri shab ko paTakta hai sar ‘hafiz’
bavar na ho to dekh jabin hai gavah choT
Leave a Reply