Noor Bijnauri
ga.e dinon ke fasane suna rahi hai mujhe
ye raat aur bhi pagal bana rahi hai mujhe
ye dhundli dhundli si parchha.iyan hain ya ḳhilqat
uTha.e sang-e-malamat Dara rahi hai mujhe
khula vo ek daricha ghane daraḳhton men
vo sabz-posh hava phir bula rahi hai mujhe
mujhe to chand kahin bhi nazar nahin aata
koi kiran si magar jagmaga rahi hai mujhe
mahak uThi hai achanak gali gali dil ki
kali kali se tiri baas aa rahi hai mujhe
chaman chaman miri avargi ke charche hain
nagar nagar koi andhi uḌa rahi hai mujhe
main zindagi ki saḳhavat pe kaanp uThta huun
ki be-daregh ye zalim luTa rahi hai mujhe
Leave a Reply