lau ko chhune ki havas men ek chehra jal gaya
shama ke itne qarib aaya ki saaya jal gaya
pyaas ki shiddat thi sairabi men sahra ki tarah
vo badan paani men kya utra ki dariya jal gaya
kya ajab kar-e-tahayyur hai supurd-e-nar-e-ishq
ghar men jo tha bach gaya aur jo nahin tha jal gaya
garmi-e-didar aisi thi tamasha-gah men
dekhne valon ki ankhon men tamasha jal gaya
khud hi khakistar kiya us ne mujhe aur us ke baad
mujh se khud hi puchhta hai bol kya kya jal gaya
sirf yad-e-yar baaqi rah gai dil men ‘salim’
ek ik kar ke sabhi asbab-e-duniya jal gaya
Leave a Reply