Naeem Gilani
guzre vaqt ki shayad tujhe ḳhabar kam hai
mire safar men koi tujh sa ham-safar kam hai
gila muaaf magar main jahan paḌa hua huun
mire charagh tiri raushni udhar kam hai
sharik-e-hal hui thi jahan kahin duniya
faqat vahin se tira hijr-e-mo’atabar kam hai
ga.i ruton men bahut guftugu rahi jis se
bhare chaman men vo bas ek hi shajar kam hai
tiri nazar men na hongi vo muntazir sham.en
ki dil-gali se to yuun bhi tira guzar kam hai
badan se aage jo baḌhta nahin tabib mire
so dil ke zaḳhm ki janib tiri nazar kam hai
Leave a Reply