Teri Ruh Mein Sannata Hai Aur Meri Aawaz Mein Chup

teri ruuh men sannata hai aur miri avaz men chup

tu apne andaz men chup hai main apne andaz men chup

gaahe gaahe sanson ki avaz sunai deti hai

gaahe gaahe baj uthti hai dil ke shikasta-saz men chup

sannate ke zahr men bujhte logon ko ye kaun batae

jitna uncha bol rahe hain utni hai avaz men chup

ik muddat se khushk pada hai vo jharna angdai ka

jaane kis ne bhar di hai us paikar-e-naghma-saz men chup

rag rag men jab khuun ki bunden bulbul ban kar chahak uthin

phir dil-e-‘hafiz’ kyuun kar sadhe siine ke shiraz men chup