Azm Shakri
tirgi men sub.h ki tanvir ban ja.enge ham
ḳhvab tum dekhoge aur ta.abir ban ja.enge ham
ab ke ye socha hai gar azad tum ne kar diya
ḳhud hi apne paanv ki zanjir ban ja.enge ham
ansuon se likh rahe hain bebasi ki dastan
lag raha hai dard ki tasvir ban ja.enge ham
likh na paa.e jo kisi ki nim-baz a.ankhon ka raaz
vo ye va.ada kar rahe hain ‘mir’ ban ja.enge ham
gar yuun hi baḌhta raha din raat shughl-e-mai-kashi
ek din is mai-kade ke piir ban ja.enge ham
us ne bhi auron ke jaisa hi kiya ham se suluk
jo ye kahta tha tiri taqdir ban ja.enge ham
Leave a Reply