Ibrahim Ashk
mohabbaton men jo miT miT ke shahkar hua
vo shaḳhs kitna zamane men yadgar hua
tiri hi aas men guzre hain dhuup chhanv se ham
tiri hi pyaas men sahra bhi ḳhush-gavar hua
na jaane kitni baharon ki de gaya ḳhushbu
vo ik badan jo hamare gale ka haar hua
tumhare baad to har ik qadam hai ban-bas
hamara shahr ke logon men kab shumar hua
ḳhud apne aap se lena tha intiqam mujhe
main apne haath ke patthar se sangsar hua
ye ek jaan bhi leta hai ‘ashk’ qiston men
zara sa kaam bhi us se na ek baar hua
Leave a Reply