Poet
vo ham se ho gaya hai be-ḳhabar kuchh
badalte mausamon ka hai asar kuchh
kahin saa.e men ruk kar kya karenge
chalo ab tez baaqi hai safar kuchh
hava-e-tund ka ye kaam dekho
na chhoḌa shaḳh par baaqi samar kuchh
bhaTakte phir rahe hain raston men
basarat se tahi ahl-e-nazar kuchh
agarche shahr to apna hai lekin
para.e se hain kyuun divar-o-dar kuchh
abhi dil men uḌanon ki hai ḳhvahish
salamat hain hamare bal-o-par kuchh
abhi ‘shahid’ luTao gham ki daulat
abhi hain aankh men la.al-o-gohar kuchh
Leave a Reply