vahi ta.alluq-e-ḳhatir jo barq-o-bad men hai
dil-e-sitam-zada ki hasrat-o-murad men hai
har ek ahd ki hoti hai ik ḳhususiyyat
hamare daur men yaksaniyat tazad men hai
kisi natije pe pahunche hain ghaur-o-fikr ke ba.ad
to ye ki saara jahan ek gard-bad men hai
agar nazar ho to paḌh lo payam-e-bedari
fasil-e-shahr pe likkha hua fasad men hai
vo baat saari kitabon men mil nahin sakti
jo inqalab ke chhoTe se istinad men hai
vahi asas-e-mohabbat bhi hai aqidat bhi
vo e’timad ka pahlu jo e’tiqad men hai
vahi to fan men rivayat ki ruuh hai ‘azar’
vo ek chhoTa sa nukta jo ijtihad men hai
Leave a Reply