Amjad Islam Amjad
parde men laakh phir bhi numudar kaun hai
hai jis ke dam se garmi-e-bazar kaun hai
vo samne hai phir bhi dikha.i na de sake
mere aur us ke beach ye divar kaun hai
bagh-e-vafa men ho nahin sakta ye faisla
sayyad yaan pe kaun giraftar kaun hai
maana nazar ke samne hai be-shumar dhund
hai dekhna ki dhund ke is paar kaun hai
kuchh bhi nahin hai paas pe rahta hai phir bhi ḳhush
sab kuchh hai jis ke paas vo bezar kaun hai
yuun to dikha.i dete hain asrar har taraf
khulta nahin ki sahab-e-asrar kaun hai
‘amjad’ alag si aap ne kholi hai jo dukan
jins-e-hunar ka yaan ye ḳharidar kaun hai
Leave a Reply