nashili chhanv men biite hue zamanon ko
laga do aag ajal ke nigar-ḳhanon ko
bata rahe hain jabin-e-hayat ke tevar
panah mil nahin sakti ab astanon ko
diye jalao ki insaniyat ne toḌ diya
jahan-e-zar ke ru-pahle tilism-ḳhanon ko
har ek gaam pe mash.al dikha rahi hai hayat
sitam ki aanch men nikhre hue zamanon ko
hazar dar-o-rasan Dagmaga nahin sakte
ajal ki god men khele hue javanon ko
bahut qarib hai vo daur ḳhush-gavar ki jab
nigar-e-amn saja.egi kar-ḳhanon ko
ḳhud aage baḌh ke qadam chumti hai manzil-e-shauq
ye kis ne raah dikha.i hai karvanon ko
Leave a Reply