mere tasavvurāt haiñ tahrīreñ ishq kī
zindānī-e-ḳhayāl haiñ zanjīreñ ishq kī
ta.abīr-e-husn hai dil-e-majrūh kā lahū
chhīñTe paḌe to ban ga.iiñ tasvīreñ ishq kī
dāġh-e-firāq zaḳhm-e-vafā ashk-e-ḳhūñ-fishāñ
roz-e-azal se haiñ yahī jāgīreñ ishq kī
shām-e-ḳhizāñ ko sub.h-e-bahārāñ banā diyā
tartīb-e-zīst ban ga.iiñ ta.azīreñ ishq kī
‘sāġhar’ jahān-e-shauq meñ dekhī hai jāvedāñ
ahl-e-nazar ke sāmne tafsīreñ ishq kī