Poet
kahan tak zabt karta be-ḳhudi se ashna ho kar
naqab-e-raz main ne bhi ulaT di lab-kusha ho kar
hayat-e-ishq ki har saans sarf-e-justuju kar de
latafat dil ki zaa.il kar na manzil ashna ho kar
ḳhuda ma.alum us ki justuju mujh ko kahan laa.i
ki ḳhud bhi kho gaya huun apne markaz se juda ho kar
faza-e-dahr kar di pur-sukun kaif-e-tarannum se
kisi ne parda-e-har-saz se naghma-sara ho kar
badal di husn ki fitrat miri shan-e-taḳhayyul ne
vo majbur-e-karam ḳhud ho ga.e sabr-azma ho kar
mujhe is alam-e-hairat men laa.e hain tire jalve
ki tera a.ina main ban gaya huun ḳhud-numa ho kar
mujhe is be-niyazi par na de ilzam-e-ḳhuddari
ki aaya huun azal se na-shanas-e-mudda.a ho kar
Leave a Reply