zindagi chaak hui kya ho rafu ki surat
mil ga.i ḳhaak men ab zauq-e-numu ki surat
hausle kya hue chaḌhte hue dariyaon ke
regzaron men kahan kho ga.i ju ki surat
ḳhvahish-e-sim-badan se hua vahshat ka nuzul
nashsha-e-jism ne kya kar di lahu ki surat
dukh-bhari shaam ke neze pe sisakte hue log
zarre zarre se Tapakti man-o-tu ki surat
za.iqe talḳh hue aankh se vahshat Tapki
kaun yaad aaya ‘jamal’ aaj adu ki surat
Leave a Reply