raat ik khvab ne ankhen mire andar kholin
aur bistar ki shikan khinch ke sidhi kar di
phir sirhane se ikatthe kiye guzre lamhe
ek tasvir bana kar sar-e-mizhgan rakh di
aankh kholungi to ye bojh girega aise
aankh ka gumbad-e-simab pighal jaega
mere sab khvabon khayalon ko nigal jaega
aur agar aankh na kholi to ye girya karte
sar patakte hue lamhe kisi dimak ki tarah
aankh ke band ghilafon se chipak jaenge
is imarat ka har ik naqsh mita dalenge
ab jo karte hain ye bistar ka tavaf ahista
mere hone ke bahane se zara pahle hi
is dariche men ubhar aae sahar ki aahat
satven phere ke aane se zara pahle hi
Leave a Reply