Jameel Yusuf
teri talab men aise giraftar ho ga.e
ham log ḳhud bhi raunaq-e-bazar ho ga.e
kya ḳhvab tha ki kuchh nahin Thahra nigah men
kya aks tha ki naqsh-ba-divar ho ga.e
hadd-e-nazar bichha tha tiri diid ka saman
jo raste the sahl vo dushvar ho ga.e
un ko bhi apne naam ki hurmat aziiz thi
jo tera saath dene pe tayyar ho ga.e
biphra hua badan kisi qatil se kam na tha
ham bhi vufur-e-shauq men talvar ho ga.e
go apne paas ek nazar ke siva na tha
ham har but-e-hasin ke ḳharidar ho ga.e
ye shahr zalzalon ke thapeḌon se hil gaya
kya kya ajab mahal the ki mismar ho ga.e
ḳhvahish ki uljhanon pe koi bas na chal saka
da.ave fusun-e-yar ke be-kar ho ga.e
Leave a Reply