zamin se chal ke to pahuncha huun asman tak main
safar ka bojh uthae phirun kahan tak main
azal vajud safar raste ki dhund adam
qusur-var huun tartib-e-dastan tak main
sukun-e-zist ibarat tha jis ki yadon se
bhula chuka huun vo harf-e-qarar-e-jan tak main
ye soch kar na koi raste men lut jaae
diye jalata chala ku-e-dilbaran tak main
main zindagi ki inayat se nahin mahrum
qarib huun gham-e-dil se gham-e-jahan tak main
na farsh mera thikana na arsh mera maqam
ye aur baat zamin par huun asman tak main
Leave a Reply